మళ్లీ తెరపైకి గ్లోబల్ స్టార్ వార్.. రామ్ చరణ్‌కు ఇవ్వొద్దంటూ రచ్చ..

‘ఆర్ఆర్ఆర్’ సినిమా ఆస్కార్ అవార్డును సొంతం చేసుకోవడంతో ‘గ్లోబర్ స్టార్’ ఎవరనేది నెట్టింట పెద్ద ఎత్తున చర్చ జరిగింది. ఒకరకంగా ఫ్యాన్ వారే జరిగింది. ఈ సినిమాలో చేసిన స్టార్ హీరోలిద్దరూ ఎన్టీఆర్, రామ్ చరణ్ ఫ్యాన్స్ నెట్టింట పెద్ద యుద్ధమే చేశారు. గ్లోబల్ స్టార్ మా హీరో అంటే మా హీరో అంటూ రచ్చ రచ్చ చేశారు. అయితే చివరికి ఈ ట్యాగ్ మాత్రం రామ్ చరణ్‌కే అఫీషియల్‌గా వెళ్లిపోయింది.

అంతా ప్రశాంతం అనుకుంటున్న సమయంలో తిరిగి ‘మెగా పవర్ స్టార్’ టైటిల్ హాట్ టాపిక్‌గా మారింది. బుచ్చిబాబు సాన దర్శకత్వంలో ఆర్‌సీ 16 అనే వర్కింగ్ టైటిల్‌తో మూవీ తెరకెక్కుతున్న విషయం తెలిసిందే. ఈ సినిమాలో చెర్రీ ట్యాగ్ ను ‘గ్లోబల్ స్టార్’ గా మార్చారు. దీంతో తిరిగి ఫ్యాన్ వార్ స్టార్ట్ అయింది. రామ్ చరణ్‌కి అదేం ట్యాగ్ అంటూ ట్రోల్స్ మొదలయ్యాయి. ఈ గోలంతా ఎందుకులే అనుకున్నారేమో కానీ ‘గేమ్ చేంజర్’ మూవీ మేకర్స్ గ్లోబర్ స్టార్ ట్యాగ్ జోలికే వెల్లడం లేదు.

ప్రస్తుతం శంకర్ దర్శకత్వంలో రూపొందుతున్న ‘గేమ్ చేంజర్ మూవీపై ప్రేక్షకుల్లో అంచనాలు భారీగా ఉన్నాయి. నేడు చెర్రీ పుట్టిన రోజు ఈ సందర్భంగా ఈ సినిమా నుంచి ఓ పాట విడుదల కానుంది. ఈ సందర్భంగా విడుదల చేసిన పోస్టర్‌లో గ్లోబల్ స్టార్ అని కాకుండా, మెగా పవర్ స్టార్ అనే ప్రస్తావించడం మెగా ఫ్యాన్స్‌ను డిజప్పాయింట్‌కు గురి చేసింది. గేమ్ చేంజర్ నుంచి విడుదలైన ఈ ఒక్క పోస్టరే కాదు.. ఇటీవల విడుదలైన అన్ని అప్డేట్స్‌లోనూ చెర్రీకి పాత ట్యాగే చిత్ర యూనిట్ వాడుతోంది.